سكون خيم ع النون ( صورة من النت وبلاوية )

سكون خيم ع النون ( صورة من النت وبلاوية )

صورة من النت وبلاويه

مشوار غريب عجيب علينا ...
ورانا من بدعه كتير ...
اللي اتعلمناه براه ...
مالوش جواه تفسير ...
دخلنا برجلينا اليمين ...
وسمينا بالرحمن ...
وقلنا ياهادي ياكريم ...
كانت أمنيتنا ...
نقطف من عنقوده عنبايه ...
تبل ريق الجهل بيه ...
يعلم فينا علامة ...
تنفعنا ويزيد علمنا بيه ...
ياخدنا معاه لسماه ...
يورينا الدنيا من شباكه ...
ويقرب مسافتنا معاه ...
لقيناه بحر مالوش نهاية ...
غويط ...
كل مانزلنا ...
بداية ...
عمال ياكل فينا بإيديه وسنانه ...
مش مدينا وقت يكفيه ...
ولاحركة تلحقنا بيه ...
ساحبنا من عينينا وأيدينا ... وبنجري عليه ...
بننسي واحنا أدامه ...
مين فينا التاني ...
ده عالم تاني غير اللي اتعودنا عليه ...
بنعرف ناس وناس بتعرفنا ...
لاعرفناهم ولا هما عرفونا ...
علي هوي هوانا بنرسمنا ...
وبنعلي في مراتبنا ولا حد شايفنا ...
من ورا شبابيك وابواب ...
بنحكي حكايتنا ...
بنرشها بالورد ساعات ...
وساعات بنحرق دنيتها ...
وساعات بنعيشها في وحدتنا ...
علي شاشة غرقانة دمعتها ...
غير اللي خانونا ...
وقتلونا وبمية نار رشونا ...
ولسه بتعيط صاحبتنا ...
ده غير آسامينا ...
ولون مناديلنا .. وعطر هوانا ...
وفسيخ قسوتنا ...
وعمر جنابنا ..
وسن ولادنا ...
وعمر الأبلة وخالتي بمبة ...
يووووه ...
ده مولد آلوانه عجبي علي رأي عمنا جاهين ...
يلوح البت البلدي ...
ويلم الناس من بيتها ...
غير الألقاب اللي ماشية بقباب ...
بتطرقع في طرقة ستي ...
أيشي منحور وأيشي مئهور ...
وإيشي ضميره مشتي ...
داخلين في تراوة صبحية ...
يلمو الغلة منيها ومن هي ...
عالم كله مستخبي ...
حتي المدلول يامصدي قلبه يامعبي ...
والغريب العجيب ...
اللي يودي في داهية بحق ...
أنك تدي الحكم بجد ...
وتاخد منه زاوية وتنهي ...
أو تتقرب منه بجد ...
وهو في حتة وانت في غيرها ...
أوتبني طوبة علي طوبة في أرض الحد ...
وتعلي الهمزة واللمزة ...
والكسرة المسحوبة بغمزة ...
وتقع تندب ...
والحرف المزكوم واللام ...
عالسطر تغطس وتئب ...
وصويت نازل علي الخط ...
وآهات بتفحت فحت ...
وسكون خيم عالنون ...
وغياب طال بس ظنون ...
وبداية تايهة لوامة ...
وحصار محصورعلي آخره ...
وفراغة العين بتغب ...
عالم سكانه غير ...
وعشرتهم غير ...
وحياتهم ملهاش حد ..
إلا من رحم ربي ...
فتحي عيسي

للمزيد من مواضيعي